La propietaria de mio casa, kyria Keti, ye una maruxa amable y tirando a modernona cola que comparto patiu y charres cotidianes. La muyer, típica madraza, tiense propuesto faceme ganar kilos a fuerza de traeme cada sí cada tamiénraciones de los llambiques que cocina; yo pela mio parte intenté durante dalgún tiempu nun quedame atrás y atroca-y tamién amueses de los mios platos. Por desgracia, pronto hebi rendimi a la evidencia de que nun esiste competición posible: tenía de camudar d’estratexa. Agora’l plan ye deprender a la perfeución toles sos recetes (qu’ella mesma me da ensin arrecelu dalu) pa, siquier, aspirar a dir llegando dpaulatinamente al so nivel no qu’a fogones cinca. Los resultaos pol momentu son más bien mediocres, pero güei por fin conseguí bordar una receta. Cellébrolo poniéndola equí: ye la Torta d’Almendres de Kyria Keti, un bizcuechu duru y contundente pa tomar en pequeñes dosis col café. (Nota: puede cortase en pequeñes rabanaes y guardase nuna caxa de lata, darréu qu’aguanta bien de tiempu ensin estropiase).

Dedíco-y la receta a Bea y al so fantásticu Kooking with K, qu’en dalguna ocasión me sacó de dalgún apuru culinariu.

Torta d’Almendres de Kyria Keti

500 g. de fariña de lo que yá tien lleldu preferentemente, (si non ponémos-y nós un sobrecín)

500 g. d’azúcara

500 g. d’almendres pelaes

400 g. de pases

3 cucharaes de mantega derretío

un chupito de coñá o brandy

un poco de vainilla o una casca de llimón o naranxa

3 güevos

Lo único importante ye mesturar los güevos cola azúcara en primer llugar y dir amasando de la que s’añiden los ingredientes, y recordar char les almendres a lo cabero: la masa ye tan gordo que si non amasalo faise una tortura porque ye mui gordo. Métese en fornu 40 minutos nuna fuente enfariñada y s’espera depués contando azulexos (meyor si tienen florezuques).